絲絲講場：公司仔兇經紀行惡過藍籌

證監會向券商「查倉」大家就聽得多，查實上市公司都有權就其股份權益進行調查，要求券商提交股份受益人同埋持股量等資料。最近絲絲就八到單嘢，有啲上市公司細細，但叫券商查倉時，仲辣過啲大藍籌。

話說有間創業板公司，早前去信叫券商提交股東資料嗰時，信上竟喺當眼位置，用紅字Highlight「警告」話，如果券商喺冇合理解釋下唔交資料，又或者係提交錯誤及誤導資料，就會觸犯刑事，有可能最高判監2年咁話！

好多券商收到封信後好大反應，話都係「第一次」收到有公司用啲咁「強烈」嘅字眼叫人查倉，「雖然呢個係法例，但話晒都係叫人（券商）幫手做嘢，使唔使開口埋口嚇人話坐監咁寸呀！」啲券商仲話，啲大公司好似騰訊控股（00700）同滙豐控股（00005）咁，叫券商查倉都唔會咁寫，客氣得多！

照絲絲睇，大公司大把資源，查倉呢啲工夫，通常唔會自己落手落腳，而係委託外邊啲專業機構去做，有晒程序；反而細公司好多時要一腳踢自己搞掂。唔知係咪咁，所以「落藥」重咗啲辣咗啲呢？

余絲韻