幾個星期前，我於專欄上指摘過某些沽空機構的惡行，指他們利用自己對市場的影響力來搵食。前兩日，我又從魚缸裏聽到一個傳聞，指一間為客戶提供股票戶口託管服務（即係幫人炒啦）的公司於一夜之間跌咗一個億，仲要係美金喎！
歸根究柢，原來是買了德普科技（03823），仲要畀人Call孖展！最終，不但只劣後級別的投資者見財化水，就連優先級別的投資者都要幫手「科水」，身家唔見咗一大截呀陰功！
今時今日，能夠把股市玩弄於股掌之中，而又天不怕、地不怕的仲有美國佬！不是嗎？大家對德銀的股價同信貸違約掉期（CDS）忽然成為了市場的焦點有幾了解？目前既不是海嘯，又不是歐債危機，為甚麼早唔爆，遲唔爆，偏偏於這個風平浪靜的時候就來爆呢？
始作俑者就是美國司法部。他們早前就德銀於○五至○七年間涉嫌違規銷售按揭證券的失當行為判處140億美元罰款，令德銀違約風險發酵，觸發港股上周五跌逾400點。不過，世事如棋，市場於即晚就傳出德銀可能同美國司法部達成和解，令罰款大幅減少至54億美元，刺激港股本周一急彈，且收復了大部分失地！
其實德銀會唔會爆，又或者唔爆，或是事件要拖幾耐，完全掌握於美國司法部的手入面。我估計，這個問題仍會困擾市場一陣子，而最有效管理風險敞口辦法是：監察德銀CDS的變化囉！當你了解到德銀的CDS於上周五原來是一點風吹草動都無的話，就唔會咁容易畀人呃貨啦！
富昌金融研究部總監 譚朗蔚（作者為註冊持牌人士）