絲絲講場：「交叉銷售」近期猛遭交叉
近排被人「交叉」得最多嘅金融詞彙，怕且就係「交叉銷售」呢個詞彙。
其實所謂交叉銷售（Cross-selling），即係啲客幫襯銀行呢隻服務時會交出個人資料，銀行按呢啲資料分析吓個客可能有其他需求，跟住再Sell個客第二啲產品咁，其實係業界好普遍。
搜尋次數創新高
不過，最近連股神巴菲特隻愛股富國銀行都爆出單「交叉銷售」醜聞，話佢哋擅自為客戶開200萬個戶口，上周同監管當局以14億幾港元和解，令人關注業內「交叉銷售」手法，令「Cross-selling」搜尋次數創新高。
話口未完，尋日又話輪到摩根士丹利旗下一間零售經紀行，被麻省當局控告以高壓手段逼員工「交叉銷售」金融產品，控詞仲話「不誠實、不道德」！
其實在商言商，「交叉銷售」真係正常不過，依家息口低成咁，市場風險胃納又咁細，大行唔進取啲等食西北風？不過，近期咁風聲鶴唳，睇怕「交叉銷售」呢幾粒字會喺投行人把口暫時消失一排。
余絲韻