絲絲講場:開壇傾改例證監有人蒲頭

早前上市公司商會舉辦上市改革研討會,證監會及香港交易所(00388)齊齊「閃」冇出席,被與會者「遺憾」。今日(十月五日)立法會金融界議員張華峰聯同經民聯及四個金融界商會再舉辦上市架構諮詢研討會。絲絲聽聞證監會同港交所今次唔會再「閃」,將會各自派「觀察員」出席聽取意見。

歐達禮李小加料缺席

顧名思義,「觀察員」主要係在場「觀察」,預期唔會參與研討會討論,所以大家都唔使奢望今日研討會將會有咩火爆場面,更遑論見到兩個機構嘅大佬級人物,如證監會主席唐家成、行政總裁歐達禮、港交所行政總裁李小加等!

僅派「觀察員」聽意見

公道啲講,證監會同港交所今次唔再「閃」,肯派代表親自到場直接聆聽業界意見,都算係一個進步。不過,研討會目的係「交流」意見,咁業界對派出「觀察員」又肯唔肯收貨呢?

講番上市改革進展,面對早前反對派排山倒海般嘅反對聲音,證監會將諮詢期延長兩個月,事態發展暫時靜咗落嚟,證監會亦「不變應萬變」,萬事都等諮詢期完結後,收齊所有意見再決定下一步點做。但愈接近特首及選委選舉,情況會愈來愈複雜,對證監會未必有利。但如果今次改革又拉倒,證監會下次想再提更困難。呢個困局點解決,真係要拭目以待!

余絲韻