落盤賺蝕有路捉？有o架！原來係睇操盤手當時嘅情緒波動程度。美國華爾街最近有套新系統，靠Check住啲Trader（交易員）即時通訊用啲咩字，即知佢哋當時High緊定慄緊，分析到佢哋幾時落盤賺最多。
個系統可以實時Check住操盤手嘅電郵及短訊用咩字眼，分析呢啲字眼所帶情感水平，計出佢哋當時情緒波動指數。賺蝕點捉到路？驗證過數據後發現，原來情緒波動指數處於中度，即係唔High又唔慄時所落嘅盤最精準，最賺得多。所以「淡定有錢剩」係真嘅。
系統嘅分析結果，當然係即時通報畀上司，有乜唔妥可以即時插手，投資賺蝕又多一重保障。
系統開發者係美國凱洛格管理學院（Kellogg School of Management）教授Brian Uzzi同另外兩名研究人員。佢哋用兩年時間，分析咗超過120萬條Trader短訊先至完成，仲搵咗兩個對沖基金試過。查實好多金融機構都有自己嘅電郵及短訊分析系統，阿教授認為順便分析埋心理狀況唔係難事，係時候發揚光大廣泛使用咁話喎。
咁搞落去，會唔會有日啲大行規定Trader要戴住儀器測住心跳、腦電波咁嚟Trade？話時話，逼你戴隻Apple Watch或乜乜手環有幾難，唔好畀絲絲開口中……
余絲韻