絲絲講場：想做富豪大學要揀邊科？

由微軟創辦人蓋茨、Apple前教主喬布斯、到facebook話事人朱克伯格，位位超成功富豪都係中途輟學走去創業？不過咁喎，頂級億萬富翁調查顯示，成功創業家大部分讀過大學。所以，唔係問書使唔使讀，識問係問應該讀邊科。

GoCompare分析咗過去20年間100份《福布斯》億萬富豪排行榜上有名嘅富豪教育背景，發現佢哋76%有大學學位，其中47%為學士，23%為碩士，6%為博士。榜上富豪當中，只有四分一冇讀過或冇讀完大學。

重點嚟喇，到底邊科出最多富豪？原來係經濟與工程，尤其係與經濟相關專業；其次先到科研、藝術、人文學科。

更重要嘅係，邊間學校讀。呢班富豪多數出身頂尖院校，其中哈佛係盛產富翁最多嘅大學，哈佛大學商學院就更加係出產富豪之最。就咁，分區一樣有得計：英國出最多億萬富豪嘅大學係倫敦大學經濟學院和劍橋大學，法國就係巴黎綜合理工學院，德國則是卡爾斯魯厄大學，印度就係孟買大學。

之但係，絲絲覺得自學更重要！啲億萬富翁多數都係書蟲，蓋茨每年至少讀50本書，股神巴菲特更加係八成工作時間用嚟閱讀。喂，讀邊間學校讀咩科未必到你揀，不過如果連書你都唔執番本，Sorry，幫你唔到嘞。

余絲韻