新世代供略：女生儲首期選「宅」九龍灣
今期「新世代供略」主角大學生Maple住慣出入方便的九龍灣區，位置「無得輸」，更有感樓價應該跌少少就好快升番，早入市有着數。Maple與男友努力儲錢，可以將貨就價，住細啲都無所謂。九龍灣不乏細價屋苑選擇，極具指標性的得寶花園，內籠企理，的骰好住，入場費約350萬元起，雖較今年低位已回升不少，惟樓價仍屬相宜。
Maple正就讀大學三年級，有做兼職、和男友積極儲緊首期。她指，「依家啲樓價應該跌一跌就會再升番，所以如果要買市區樓，都要將就吓、住細啲都要揀。」
Maple又表示，住九龍灣出入方便，地點就腳，就算屋苑樓齡舊些都無所謂，如上車Budget啱的話，當然首選私人屋苑。照Maple的揀樓條件，九龍灣極具指標的細價屋苑得寶花園及淘大花園，位置優越，不難成為上車客樂園。
間隔四正 易放家具
以得寶花園為例，坐落牛頭角道，離港鐵九龍灣站僅五分鐘步程，屋苑樓齡約三十二年，八座物業提供逾二千伙，規模不小，雖然外牆稍為殘舊，惟八成單位為實用面積200餘至300餘方呎的蚊型戶，一房及兩房戶內籠四正，少虛位，易擺放家具，小家庭絕對夠住。
屋苑基座有小型商場，行兩步可到德福廣場、淘大商場，大品牌及食肆俱備，衣食住行確實「無得輸」。
盤源趨少 交投放緩
美聯營業經理謝德生表示，得寶花園目前盤源不斷減少，全屋苑僅得三十個二手放盤，較貼市價叫價已升至350萬元水平，較今年初低位回升近一成，故本月交投略為放慢，暫只錄兩宗。