絲絲講場：港男3萬本金Bid出億八

話說70後Gary當年港大畢業，打咗兩、三年工後，喺○五年同人膽粗粗夾咗兩、三萬蚊創業，喺eBay賣電子產品。「當時喺鴨寮街拎貨，幾個男仔唔賣電子嘢有咩好賣？」公司起初有三個股東，所有嘢都要一腳踢：拎貨、包裝、連出貨都係自己搞掂……努力咗十年，依家員工超過100人，港、深、英、德都有Office。

善用大數據 睇好家品

創業當然唔係一帆風順，Gary同樣經歷過低潮。六年前公司經營不善，股東要親自夾錢出糧畀員工，Gary自己嗰時仲要搞結婚，壓力大到呢。

咁落去唔係好妥，大家坐低傾，決定加大海外倉嘅投資；再加埋eBay有大數據在手，知道邊類貨品較受歡迎，畀咗啲意見佢哋開拓不同類型產品。公司最終重上軌道，去年營業額過一億元！不過Gary好謙虛咁話：「我哋仲努力緊，依家仲未上岸。」

依家網上賣嘢，內地競爭咁劇烈，新人想做仲有冇得搞？Gary建議：「唔好諗住同內地鬥低價，咁係冇得鬥，反而要認真諗吓自己定位、產品品質、同埋要夠獨特！」佢嘅貼士係，電子產品實在太多，依家去賣冇乜肉食。仲有咩好做？佢就睇好家品。Gary公司有七成係賣電子相關產品，另外三成賣家居用品同女裝，早排仲推出自家產品添。

會慢慢轉攻歐洲市場

咁邊個Market有出路？Gary目前暫時集中英國市場，不過慢慢會將焦點放喺歐洲非英語市場，但就面對難請識外語員工嘅困難。絲絲聽eBay大中華區銷售總經理及全球高級總監鄭長青講，香港賣家銷往法國、意大利同西班牙嘅銷售額，3年內勁增超過五成，最Sell得頭兩位係通訊用品與攝影錄像設備，嚟緊最受歡迎會係汽車配件、家居用品及工業機械。想創業嘅，Are you ready？

余絲韻