絲絲講場：飛達帽后「善」用花紅

「帽后」飛達帽業（01100）副主席顏寶鈴（顏太）出名凡事親力親為又捱得，佢講笑話從來都唔知自己人工有幾多，反正夠錢就使，有錢就捐，直至舊年得到一份「重磅」花紅，仲係公司上市以來佢第一次收花紅，搞到佢因為咁而要交過百萬稅。

睇番飛達一五年嘅年報，原來顏太舊年年薪得60萬蚊，比公司其他高管仲要低，但花紅就有314萬蚊，係最大份嗰個。不過顏太都唔志在錢喇，因為問到佢分咗咁多花紅做乜好，佢話最後都係用嚟捐錢！

每次見到顏太，一定離唔開孟加拉呢三個字，成個孟加拉代言人咁款。今次佢就話，依家孟加拉廠房已穩定咗，一個月只需要飛過去一次，相信最痛苦時間已過去，所以佢對盤生意放手咗，多啲時間同顏生去吓旅行，享受人生咁話！

余絲韻