依家上市公司嘅業務性質真係五花八門，上星期有間公司向美國證交會提交上市申請，話想集資1,500萬美元（即係1.17億港紙），用嚟搵傳說中嘅怪獸大腳八！依家已經係九月，所以絕非愚人節。
呢間公司個名仲好直截了當，就叫「Bigfoot Project Investments」，資料顯示公司資產包括73個大腳八腳印倒模、109吋骨架、一啲毛髮指甲DNA樣本、Video片段同古仔……嗯，而佢哋招股價係每股75美仙。不過就有投資者提醒，因為美國證交會對仙股交易要求增加咗，所以意味住會難啲轉手喎！市場Buy唔Buy？拭目以待。咁你又有冇興趣入番啲先？
余絲韻