絲絲講場：真人視像櫃員機傾足24小時
為咗迎合數碼化趨勢，唔少港銀都開始提供視像銀行櫃位服務，中銀香港（02388）現時有3個呢類人肉視像ATM機，賣點係一星期七日，每日24小時提供服務。絲絲不禁心諗，銀行呢行嚟緊會點？
3部機十個人孭起晒
中銀三個視像銀行櫃位，現分別位於荃灣愉景新城、愉景灣同沙田水泉澳邨，年底前連中環都會有。呢啲人肉視像ATM可以覆蓋大部分傳統分行所提供服務，包括信用卡、私人貸款、樓宇按揭及旅行保險等……有冇嘢做唔到？有，就係全新客開戶申請。
Run呢幾部人肉視像ATM要幾多人？聽中銀分銷網絡總經理勞秉華講，大概10個人就可以孭起晒！不過中銀話咁唔代表會減人手喎。
半數後生唔恨做銀行
畀着絲絲就驚驚，但好多銀行業行內人就樂觀得多。香港銀行學會調查話，77%受訪銀行僱員話諗住未來五年會繼續留喺呢行做，因為人工高同埋晉升機會好喎；不過年輕人未必Buy，18至34歲嘅受訪者中，只有一半認同銀行業吸引人加入。
真係想入行？香港銀行學會CEO梁嘉麗有貼士，搵工當然先要過HR（人力資源部），佢話HR衡量專業未必係睇證書，所以佢哋學會出年一月會推通用資歷基準（銀行專業會士）。就咁，絲絲一向悲觀，所以特登幫大家問多句依家行內最Hit嘅培訓課程係咩？就係「風險管理及合規」。Well，好多時唔係話你諗住，就一定有得留低嘅。
余絲韻