孖妹S檔案：股場小學雞 搵專家惡補

黃：耀才證券高級分析員 黃偉豪

謝：香港財務策劃師學會董事會主席 謝汝康

1.買藍籌一定穩打穩紮？

彩兒：啱啱開始投資股票，計我話識買一定買藍籌，納入得做恒指成分股，公司規模有番咁上下，一定安全，唔怕會蝕錢啦。

黃：一定唔係啦，藍籌可能係大市嘅指標，入得恒生指數，大家可能會覺得佢哋有一定參考性，但其實恒指成分股嘅挑選準則，包括股份嘅成交額同市值夠唔夠大，如果呢兩方面符合條件，就有機會被納入，但唔等於間公司嘅股價同業務前景係好同穩定，以中國旺旺（00151）為例，呢隻內地食品股近年業績都麻麻，去年年頭股價仲有10蚊，但依家跌到得番5蚊左右，所以話買藍籌都唔係一定好安全，咩都唔使理（口架）。

2.買收息股唔使理股價升跌？

Kitty：有啲公司每年都派股息，將部分盈利派畀股東，我買股票旨在長揸收吓息（口架）咋，股價升跌都無所謂。

黃：一定唔係啦，大家想買股票收息，以往揀內銀股都勉強可以，因為息率都幾高，閒閒哋都有6、7厘，股價變動亦唔大，大家覺得收息就可以唔理股價，但若以其他板塊嚟講，我覺得就未必可以。股息率係每股股息同每股股價嘅比例，公司派息多可以形成股息率高，股息率高亦有可能係因為股價跌得多。假設派息高，但業務不濟，閒閒哋股價跌番6至7%，理論上已經冇得賺息。

3.只要肯等，隻股實可以返家鄉？

彩兒：股票價格可升可跌，不過唔緊要吖，我有嘅係青春，就算佢係咁跌，只要我一日唔放，總有一日可以等到佢返家鄉嘅，咁投資股票，仲唔係必賺？

謝：香港人投資股票普遍有個壞習慣，就係蝕錢嘅公司就死都唔沽，主要因為條氣唔順，反而要用錢嘅時候就將啲賺錢、有前景嘅公司沽咗佢，咁樣當然好大機會輸錢。

黃：我覺得要適當定番目標價同止蝕價，不斷跌係咪可以反彈番上去、要幾耐先反彈冇人會知，係咪一定發生亦冇保證，反而會鎖死咗筆錢，冇得做其他投資，冇咗個彈性。如果業務比較好、前景理想嘅，目標價同止蝕價唔怕定闊啲，比如10至15%，買投機味重啲嘅股份，止賺止蝕價就要定窄少少。

4.股票PE低就等於抵買？

Kitty：揀股就梗係睇市盈率（PE）啦，每股市價同每股盈利嘅比例愈低，即係愈抵買啦。

黃：唔同行業有唔同睇法，例如內銀會睇市帳率（PB），濠賭股就要睇埋企業價值（EV），唔係話淨睇PE就得，如果喺同一個板塊揀股，當然盈利水平差唔多嘅公司，低PE會係吸引啲。

謝：一隻股票抵唔抵同股價高低就冇關係嘅，譬如隻股票每年有五成盈利增長，咁即使PE有成50倍，都可以支持到股價升。又例如俄羅斯股票曾經得幾倍PE，咁係因為嗰度嘅政治風險高，市場會要求一個較高嘅風險溢價，令股票唔值錢。另外，睇歷史市盈率係冇咩意思，應該睇預測市盈率比較有用。

5.盈利增長高就係好公司？

彩兒：我買股票就想發達嘅，咁梗係揀盈利增長高嘅公司啦。

謝：股票價值長遠係基於公司盈利能力，不過睇盈利數字，要留意增長係咪純粹嚟自一次性收入，定係真係有持續增長。喺行業有壟斷地位嘅企業成功機會會較高，另外要睇企業嘅增長潛力，譬如領展（00823），佢將舊商場翻新，租金收入就可以大幅增加，咁可以睇佢仲有幾多個未翻新嘅商場，去衡量佢嘅增長潛力。又以地產發展商為例，若果佢冇土地儲備起樓，就要留意佢係咪有能力維持盈利增長。

6.股票數目愈多，風險愈分散？

Kitty：成日聽人講投資要分散風險，計計埋埋我依家揸咗成過百隻股票（口架）喇，咁樣就實穩陣。

黃：你持股數目咁多，都睇唔切佢哋嘅消息啦，到跌市嘅時候我驚你走唔切喎。

謝：分散風險唔係淨係講股票數目嘅，風險有分市場風險，好似滙控（00005）同內銀股咁，後者嘅收入主要來自內地，同前者明顯就唔同。另外，仲有行業風險同管理層風險，好似長和（00001）咁，佢本身係一間綜合企業，包含唔同的行業，做到分散行業風險嘅效果，但用全部錢買晒佢又唔得喎，因為咁樣風險會集中喺同一班管理層身上。

醒你入門選股攻略

彩兒：咁對於初入股場嘅投資新手，有咩股票可以考慮吓呀？

黃：初入門嘅投資者可以先集中了解公司嘅基本因素，睇吓公司年報，了解佢嘅基本業務同過去幾年盈利水平。若果公司業務平穩、有增長，基本面嚟計都叫理想，然後可以配合番手頭上資金、隻股票近期走勢，決定買唔買落去，千祈唔好求其聽人講個號碼就買落去呀，尤其依家個市比較難捉摸。

一開始我會建議買番一啲藍籌股、ETF（交易所買賣基金），因為藍籌起碼業務比較穩陣、清晰，唔似一啲細價股，冇咩實業。

騰訊值博 友邦基本面強

黃：藍籌我最睇好都係騰訊（00700），其實佢已經升咗好多，依家買有一定高追風險，但始終業務好強，盈利增長高，旗下業務好似廣告、手遊，未來嘅增長空間仍然好大，暫時未見到業務有轉變嘅情況。

第二隻就係友邦保險（01299），佢基本面好勁，最新業績中，新業務價值增長有三成，同埋業務分散，唔太受單一市場影響。

第三類可以留意嘅股份係本地地產股，當然有人會覺得樓價隨住宅供應增加而下跌，加息亦會拖累地產股，但係佢哋嘅股價相對每股資產淨值（NAV）折讓比較大，而美國加息步伐又應該唔會太快，會係大家預計之內嘅事。揀嘅時候我會考慮間地產商多唔多樓賣、發展方向、樓嘅質素，同埋NAV嘅折讓幅度。

money.biz@on.cc

彩兒 Kitty