港股繼續在23,000點浮沉，老實講，今個月恒指同國指表現都到晒筆者心目中的水位，只係踏入九月，外圍又預咗會風高浪急，所以都係建議看官若呢個月持貨有利潤要識收割，等季尾再作考慮。
萬達商業（03699）私有化建議獲通過，最後交易日在九月十三日。想繼續捧萬達系，就可以轉睇下隻萬達酒店發展（00169）。事實上，呢隻股交投不多，再睇埋幅圖股價由一三年高位一直反覆尋底，至今年先至有番啲見底迹象，相信街貨都收得好乾，買少少放埋一邊，博刀仔鋸大樹都有得諗。
此外，又睇番隻消費股華潤啤酒（00291），呢兩日股價係威係勢，連現兩支陽燭，昨日收報16.68元，升3.47%，成交2.28億元。集團早前公布中績，半年純利6億元人民幣，增長45%。
管理層指，今年七至八月銷量受惠於奧運推廣及炎熱天氣，有低單位數增長，而收購雪花啤酒49%股權的交易料於十月十日完成，供股集資已足以應付收購代價，現手持淨現金，有條件再物色收購對象。
純睇走勢，潤啤股價在15至16元水平橫行咗四個月，近日異動似有勢作出突破，短線回吐若能企穩16元樓上，順勢小注，博佢喺大市浪尾先發力，目標挑戰18元阻力位，失守15.5元止蝕。
司慕渢