絲絲講場：四個圖表驗證30歲大人定細路？

「離開父母搬出嚟住」、「已置業」、「結咗婚（結過都計）」、「生咗小朋友」，呢四樣上一輩認為好理所當然嘅嘢，依家又有幾多30歲嘅可以「達標」先？

同父母住遲婚成常態

香港依家不知幾多30幾歲嘅仍係單身、住喺阿爸阿媽屋企、甚至仲未畢業。咪以為呢個現象香港獨有，睇番美國人口統計局與研究組織公布數據，呢個係世界性問題！

30歲或未成年？圖解4趨勢	1/3仲住喺父母屋企	一代比一代少人結婚

數據顯示，美國現時30幾歲嘅人與四十年前嗰啲比較，有天淵之別。一九七四年時，四分之三年過30歲嘅人已婚、有小孩、已離開校園，並且有自己嘅居所；但到咗二○一五年，只有三分之一人能做到。調查仲指出，就算係美國，80後與父母同住已經係新常態。

婚姻方面，同香港一樣，美國有近半25至34歲嘅人唔多想結婚，回顧一九六○年時，僅十分之一人會咁諗。遲結婚自然遲有小孩，當中更有三分之一人明確話唔想生。

點解會咁？答案同香港差不多，就係讀大學孭落大筆債，56%人話咁阻礙獨立同謀劃人生大事。美國現時30幾歲嘅人當中，有8%仲讀緊書，睇番一九七五年時僅得1%。

連美國都係咁，香港仲差，其實，30歲仲要靠父母，有邊個想！

余絲韻