絲絲講場：全球至醒科企榜 小米遭踢走

今年排頭係亞馬遜，今年憑AI語音助理Alexa（就係嗰個聽你把聲，就曉幫你操控全屋電器嘅圓筒仔），而先拔頭籌。

排名最高嘅中國企業係百度，排第2，亮點係語音辨識與對話介面系統，仲有無人自駕車。第3位係全球最大嘅基因測序公司Illumina。第4就係電動車Tesla。仲有粒新星入榜，就係打的App滴滴出行，排第21。有人入，就自然有人出。舊年排第2位嘅小米，今年就跌出榜。「雷布斯」雷軍又唔使咁傷心，話晒有Apple陪，事關Apple自從一四年跌出榜後，就冇返過入嚟喇。

生物科技潛力夠大

值得留意嘅係，今年榜上佔比第二多係做生物科技，發展潛力唔可以睇小。

熟口熟面嘅，Google母公司Alphabet排第8（上榜因贏咗盤棋嘅AlphaGo），facebook排第15（上榜因Oculus Rift VR頭戴式顯示器），微軟排第26，Line就排第38。而中國企業就仲有華為排第10、騰訊排第20、阿里排第24。

點解冇Apple份？因評審嘅標準，係唔理名氣同市值，只考慮科技要夠創新兼有行得通嘅商業模式。

余絲韻