絲絲講場：摩通革新 撈埋潮服？
大行摩通撈埋「啡唇」？摩通紐約總部大堂有衫賣？你冇睇錯，的確係多咗間美國服裝品牌Vineyard Vines嘅Pop-up Shop，仲係同摩通合作搞出嚟嘅。搞乜？
重口味示範最貼心
絲絲講過摩通出內部通告，畀員工以「商務休閒」（Business Casual）打扮返工。（Miss咗上次嗰篇《返工唔着西裝得唔得？》？可以去「東網Money 18」嘅「致富智庫」專頁睇番，經隔籬個QR Code去到。）
今次摩通幾咁貼心咁搵嚟Vineyard Vines喺大堂坐鎮，畀啲示範出嚟，有啲仲有埋摩通Logo添，等大家買番件包着得。
順手改埋公司形象
冇錯，係「包着得」，不過「有冇着錯」就……咁嘅，Vineyard Vines用色一向大膽，粉紅與青綠係基本，係講緊男裝褲，幾咁清新！再加埋「魚魚」或「蟹蟹」印花嘅男士西裝褸，重口味得嚟又都幾有童真o架。
間Pop-up Shop一出，有人話令人更混淆，亦有人撐話凸顯到摩通夠朝氣同「玩得」喎。點都好，有人賣就有人買，聽講至賣得嘅係有摩通牌子嘅抓毛背心。
點解係Vineyard Vines？絲絲只知佢係摩通大客之一，摩通主席戴蒙都係着呢個牌子嘅。仲有冇得揀？有啩，聽講摩通亦同服裝品牌Lands' End與Rebecca Minkoff斟緊。摩通員工，祝你哋好運。
余絲韻