絲絲講場：騰訊畀Supercell擁躉圍插
騰訊（00700）公布用86億美元收購芬蘭手機遊戲開發商Supercell嘅世紀大刁，投資市場反應正面。
驚遊戲內容會變質
不過Supercell忠實擁躉似乎唔Buy，無論Supercell官方fb帳號，定大熱遊戲「部落衝突（Clash of Clans）」內地嘅官方微博，都有玩家反對單刁，甚至話罷玩公司其他遊戲！呢班「反對派」玩家，除咗驚Supercell冇得自主，亦擔心遊戲會因騰訊入股而受紅色思想控制。
估價位再上 買得過
即使內地玩家，亦批評騰訊嘅手機遊戲，唔少喺上線唔夠幾個月就會畀玩家話Out，希望騰訊主席馬化騰放過Supercell！好彩都有較中肯嘅玩家話，雖然騰訊入主，但「英雄聯盟（League of Legends）」都仲未跌Watt，叫玩家唔使太敏感。
玩家對遊戲開發商確係愛之深、責之切。騰訊強調Supercell會繼續喺祖家芬蘭獨立營運，外資大行非常睇好呢個決定。例如野村就估收購會令騰訊手遊業務遍布全球，仲睇好騰訊衝上196元，叫人繼續買！
余絲韻