眨眼一年又過一半了，有別於去年同期大時代快上快落，如今兩地股市交投萎縮，炒家難搵食！觀昨日跌市，匯市亦有波動，大戶金、股、匯全方位部置的話，大家要打醒十二分精神！
上周美國突然終止與中國的高鐵合作項目，呢頭中美經濟戰略與安全對話才剛結束，嗰頭美國就玩嘢，係唔係喺咩大問題上雙方未能達成共識的結果，不得而知。
據講該項目係美國私營鐵路公司西部快線與中國鐵路國際公司合資修建，連接拉斯維加斯和洛杉磯的高鐵項目，主要障礙係來自美國政府規定高速列車必須在美國製造，但照計雙方一開始就知道呢個問題，依家先由單方面攞出嚟講，確實頗令人費解。
無論如何，中美在經濟問題上爭端頻現，相信在全球經濟不明朗下，貿易保護主義會更加明顯。內地鐵路基建股昨日仲未止跌，中車（01766）及中車時代（03898）跌逾1%，中鐵建（01186）跌4%。
其實，中國高鐵外交有阻滯時有所聞，開展「一帶一路」戰略有冇幫助，仍停留在憧憬階段，實效難料。只是，如今行業估值某程度亦已反映相關風險因素，相信沽壓屬短暫性。以中車時代走勢看，40元關應有初步承接，守穩其上可繼續持有。
司慕渢