無論係創業定搞Marketing，想突圍？首要係創意，其次都係創意！想創意無限？第一要……懶！
係YouTube行政總裁武伊齊茨基（Susan Wojcicki）講嘅！佢上星期接受外媒訪問時話：「（成功）並非着眼於你做嘢做咗幾多個鐘。一星期做足7日、每日做24個鐘，睇怕你都好難有咩有趣諗法。」
佢認為Unplug好重要。（Unplug者，即是放工之後將工作放低也。）佢話Unplug令人更有效率，逼自己判斷事情緩急輕重，逼住要喺放工前將工作完成。咁樣，收工之後大腦有得休息，咁先睇到新角度，先會諗得出新嘢。
武伊齊茨基唔係得個講字，佢既係科網女強人，亦係5個細路嘅阿媽，「我哋有條家規，晚上六點至九點唔准睇電郵。」佢每晚都堅持同仔女一齊食飯。佢心得係，如果手機不離手，就好難抽離工作。
連微軟CEO納德拉都係咁睇。納德拉話過，佢同家人相處時會盡量放低手機，事關邊食飯邊睇手機係件悲慘嘅事。
老細老細，所以絲絲懶，係應該嘅。
余絲韻