絲絲講場：滙豐捐千萬獎學金撐叻仔叻女
講到獎學金，今次呢啲係屬於香港學生嘅！依家經濟唔好，尤其是金融業時有聽聞要裁員，環境係點大家有眼睇。雖則係咁，阿「香港銀行」未有Cut Budget，二○一五至二○一六學年繼續捐錢支持各位出色嘅同學仔，滙豐共捐出超過1,100萬港元畀超過240個香港學生，涵蓋本港各香港大專院校、唔同學系嘅本科生、副學位同高級文憑學生。
優異生號稱「滙豐學人」
其中表現優異嘅學生，仲會獲冠以「滙豐學人」（HSBC Scholars）稱號，有錢分有銜頭。滙豐扎根香港150年，就算銀行再多負面消息，個朵都仲係響噹噹嚇得吓人，「滙豐學人」一聽就知有前途，我哋香港學生使乜葡萄人哋。
余絲韻