絲絲講場：廠家賭輸人仔慘累銀行

絲絲呢排聽到Banker圈話，唔少企業賭輸人民幣貶值，累到銀行要撥備，尤其係企業銀行界，近半年做開中型企業嘅部門都風聲鶴唳。聽聞有間外資銀行，唔單止要撥備，仲搞到成個企業銀行部要凍薪，仲爭啲連個B仔都無埋，爭啲啫。

外資行撥備幾千萬

話說，呢期有兩間廠賭輸人仔貶值，累到廿幾間銀行陪輸。有間外資銀行更加唔好彩，中晒兩間廠，兩間都係佢嘅企業客，間外資銀行淨計呢兩單都要撥備幾千萬，搞到佢哋成個企業部要凍薪，並且頂多派得半個月至一個月花紅。

金融海嘯之後，香港銀行普遍都係靠企業銀行搵錢，有啲行甚至由企業部貢獻六至八成盈利都好常見，令到揼石仔嘅零售銀行一直被人睇低。依家可算係風水輪流轉，因為人仔貶值，間銀行個企業部無論花紅同人工檢討結果，竟然都差過零售銀行同事，都算近年罕見。

邊間外資銀行？你估吓。

余絲韻