想瞓個晏覺補補精神？Sorry，既唔係恒大員工，又唔係歐洲人，呢啲機會……又唔使太葡萄嘅，絲絲醒5招，等你Keep住晏晝有能量，唔使釣魚釣到跌落水。
想Hip啲？可以試奇亞籽（Chia Seeds），高纖兼高蛋白質，將奇亞籽加水，雪過夜，第二朝拎出嚟加啲Smoothies。怕太寒？麥片加果仁與各種莓，一樣得。
午餐要有一半係蔬菜，但唔好忘記蛋白質，食沙律就加多杯紅豆、扁豆或南瓜籽。想提神，就食少啲糖、白麵包、糕點。
小食首選果仁（腰果、杏仁、同榛子），果仁有齊蛋白質、脂肪同鎂，缺鎂人就會攰。又或者切塊蘋果或梨，點下杏仁醬；或切半個牛油果，點少少鹽同紅椒碎食。
唔淨止塊面，身體補水一樣好要緊！沖咖啡前，不如先飲杯水好過，又或者綠茶。不過，最好都係水。
起身行吓，行到望唔見自己張枱，畀個腦休息。依家乜都講Multi-Tasking，咁其實消耗好多能量，好似開得太多Apps，手機都會慢過人咁。熄晒佢，一陣先再搏殺過啦！
余絲韻