絲絲講場：恒大員工「攞正牌」瞓晏覺

早排絲絲同恒大公關朋友食飯敍舊，但食到尾段，絲絲見佢哋開始出現倦容，問多句先知，原來佢哋話平時呢個鐘數喺公司瞓緊覺！

有音樂叫醒開工

佢哋話，恒大廣州總部員工上上下下每日都有兩個鐘食飯時間，十二至二，食完仲會熄燈閂窗簾，齊齊攞正牌喺自己個位開摺床瞓晏覺，仲話經理主管都會一齊補補眠，養足精神！

仲有，公司仲好照顧周到，兩點夠鐘就會有音樂廣播叫醒大家開工，唔單止咁，「有時仲可以點唱，好似有同事生日會點生日歌咁！」Wow，點唱！

呢個午睡政策，其實真係唔錯，與其啲員工開工釣魚，不如索性名正言順大家小休一下，咁大家做事都有效率啲。喺個位行埋摺床……咁換唔換埋睡衣、蓋唔蓋被好呢？Well……

余絲韻