絲絲講場：王冬勝收股多過老細
滙控（00005）高層夠鐘出糧，講緊唔係現金而係派股份，獅子行啱啱公布向11位高層派30.7萬股滙控。滙豐銀行副主席兼行政總裁王冬勝（Peter）收得多過上司歐智華（集團行政總裁），Peter今次袋咗6.19萬股（折合約298萬港元）。
今次派股唔係花紅一部分，而係固定薪酬安排。睇番近季派股往績，Peter之前獲派股份都係多過歐智華嘅。
炒房舵手獲派最多
今次獲派股最多係環球銀行及資本市場行政總裁（即是「炒房」舵手）安思明，總計7.78萬股（折合約378萬港元），安思明幾乎年年冧莊。其實以往歐智華做炒房阿頭時，獲派股都係多過集團CEO，始終炒房幫銀行搵銀能力最勁，所以市場估安思明係接任歐智華大熱人選之一。
近年為滙控合規、削成本、被罰錢（下刪一千字）而非常頭痕嘅歐智華，就排第三獲派5.23萬股（折合價值約252.1萬港元）。
澳洲監管咬實滙控
滙控近年係咁畀各地監管機構啄住，最近燒到去澳洲。澳洲證券及投資監察委員會話，滙豐澳洲自○九年一月至一三年三月，向高達464名客戶提供有關複雜衍生產品投資嘅潛在不當意見，需要就事件制訂檢討計劃，仲可能要向受影響客戶作出賠償。賠幾多？未知住。陰功豬，絲絲講嘅係啲滙控忠實股東。
余絲韻