Market Insight：比亞迪享龍頭優勢

近排唔好話港股，全世界股市能見度都十分之低，儘管已感受初夏天氣，環球投資市場卻依然被大霧籠罩。今年單是日本央行推負利率以來，央行印銀紙會推低匯價的傳統貨幣供求理念，經已率先受到挑戰，圓匯近期的反常強勢，經已好難搵到合理解釋。

狂揼水而經濟毫無反應，不限於日本，美國首季GDP升幅縮到得0.7%，是兩年來最差，推動全球經濟的最後一架火車頭都有死火先兆，加埋四月非農新增職位遜預期，利率期貨顯示，估六月加息機會率跌至4%，若非聯儲局要整蠱華爾街大孖沙，揀大選年先來個出其不意，引發股災，否則短期唔加息可以話無懸念。

金價升浪唔似虛火

事實上，睇番幾個主要經濟體物價都走緊下坡，歐元區CPI負0.2%，德、法、意三個老大哥分別是負0.1%、負0.2%及負0.4%，日本三月CPI負0.1%，經歷過三輪量寬，美國曾經成功谷高物價，一一年CPI見過3.2%後，量寬效果遞減，已見級級落，今年三月CPI放緩至0.9%，同2%的目標有大段距離。綜合整體形勢，環球央行對經濟陷入惡性通縮的憂慮肯定遠大於通脹重臨。

回帶睇番金融海嘯之後，經歷三輪QE，聯儲局上任主席「直升機賓」肆無忌憚印鈔，唔再相信鈔票有價，結果國際金價曾由682美元炒到上1,921美元，不足三年累升1.81倍。小眾想法，認為聯儲局今年不單加唔到，下一次出手可能要跟潮流減番去零。當然，短期看似乎一動不如一靜機會較大，但年底大選過後，假如經濟再下潛，在歐、日負息之下，行番轉頭都唔係無可能。

吹水可以唔信，但睇金價近期升浪確實係實牙實齒，半年間由1,046美元升至1,303美元，低位一浪高於一浪。去年港股大時代，港股一直擺脫唔到跌得耐、反彈短暫的熊市形態，對股市無乜心水，成手蟹貨等運到的，其實可以諗吓買番些少黃金，當作對沖或者分散投資都好。

無章法併購難接受

中國建築（03311）以48.1億元向中國海外（00688）收購中國海外大廈，儘管收購所需不假外求，會透過向母企──中國海外集團以每股11.14元發行4.318億股以備收購之用，變相是母企向中海注入現金，同時增持中國建築之舉動。但消息一出，中國建築股價還是一插到底，昨急挫9.1%收報10.34元，見近八個月新低。

個市一堆「乜通也通」依然愈玩愈縮，大孖沙對投資中資企業耍手擰頭，唔好話成車財務文件被劫可停牌拉閘，單係正路企業併購，無章法已玩死投資者。

建築從來是資本密集生意，突然塞一幢租金回報2%左右的物業落嚟，即使印公仔紙唔需要動用真銀，但對舊有股東突然做埋收租佬唔，單止無協同效應，股東資本回報亦好大機會被攤薄。

低現金流的收租生意，唔多唔少影響派息比率向來唔錯的中國建築，除咗多舊磚頭可以同銀行容易啲借平錢之外，真係諗唔到交易有即時的好處，仲要香港商廈價落緊，除時賺埋息唔夠蝕價！

中央積極推動新能源車發展，唔單止以補貼鼓勵民眾購買，國家機關都配合節約能源，配備更新公務用車時，新能源車的比例要達到50%以上。中汽協剛公布咗首四個月新能源車產銷數據，分別同比增長1.27倍及1.31倍，可見行業增速快，消息刺激比亞迪（01211）及長汽（02333）各升逾0.7%；電池股超威（00951）升5.3%，天能（00819）亦微升0.3%。

新能源車競爭加劇

比亞迪早前公布咗首季業績，收入按年增三成至203億元人仔，純利增逾6倍，主要來自新能源車及手機業務的貢獻。同時，集團預計上半年純利介乎22.5億至24.5億元人仔，按年升3.8至4.2倍。由於比亞迪在技術、產品方面均有優勢，其地位短期內難被取代，但行業競爭激烈，加快產品周期以迎合市場需求十分重要。

不過，國策雖然大力支持行業發展，但同時有人乘機呃補貼，早前國務院常務會議已提出，要完善新能源汽車財政補貼等扶持政策，以打擊同預防騙取補貼行為。有傳聞話中央會削減補貼，如果情況繼續惡化的話，都唔係冇可能發生。

古勝