絲絲講場：渣打利迷 「球」之不得?
政治同波（絲絲呢度講嘅係足球），最易令人打交，球迷嘅嘢又無得勉強。你嘅愛隊係利物浦，但撞啱你上司係宿敵曼聯球迷……Well，喺Office唔提個「波」字囉。
嗱，若然你有幸，公司與你同一陣線，公司唔單止贊助利物浦，仲搞埋球迷活動……只不過，你依然有個超級曼迷上司，咁今次又點算？畀唔畀佢知自己係利迷好？
贊助利物浦近5年
咁嘅人生交叉點，就喺渣打發生。有某渣打利迷呻，因為上司係曼迷，搞到自己參加公司活動都要偷雞。
話說渣打捧利物浦就出晒名，一一年七月起贊助利物浦。渣打利迷吐氣揚眉啦，返工攞正牌撐利記，就算未攞到英超冠軍又如何？何止咁，渣打偶爾仲會搞活動，例如請利物浦名宿出山搞簽名會，一年買幾件波衫嘅利迷梗興奮。
瞞曼聯迷上司攞簽名
不過，世事邊得咁完美？遇着上司係Die-hard曼迷，信就梗係信老頂公私分明兼為人成熟；之不過，睇住老頂佢平日被迫要跟公司「足球方針」，怕屈埋唔少氣，遇着呢啲「官方活動」，喺佢面前咁大搖大擺咁認係紅軍？怕萬一老頂份人好小器……
之但係，個簽名會既然係公司搞嘅，唔單止就手，直頭係向自己招晒手，身為利迷又點可以唔撐？
結果，渣打利迷就制訂一招「偷天換日」策略，先搵另一部門同事託運波衫去簽名會，自己再偷雞會合，總之一定唔可以畀曼迷老頂發現。就咁嘅，故事如有雷同，實屬不幸。
余絲韻