絲絲講場：老趙私人醒餅卡冧小股東
通常小股東出席上市公司股東大會都有兩大熱門問題去問管理層，一係問股價升唔升，一係就問自己可唔可以攞多份小禮物。話說尋日泓富產業信託（00808）股東會，入場時派張黃色飛仔，畀股東離場時憑飛換領餅卡一張，不過呢啲飛仔疑似唔夠派，一度令股東鼓譟，最後要由「樓神」趙國雄開口話「我私人出錢寄番張餅卡畀你」先至贏得全場掌聲。
請埋屋企人食又點話
其實要出席股東會，必須事前登記兼簽名作實，所以上市公司唔會預唔到人數，餅卡無理由唔夠派。不過依絲絲觀察，好多小股東其實係想額外攞多張餅卡。有人問「我屋企有個老人家可唔可以畀多張佢？」
類似問題浪接浪，佔咗好多時間。照道理唔係股東應該無餅卡，不過主席趙國雄就好慷慨話多謝各股東多年來嘅支持，只要登記姓名同埋地址，佢私人寄番張餅卡畀佢，希望大家開開心心。最後埋單有廿幾人登記，以一張五十蚊計，趙樓神笑住話千零蚊佢依家仲畀得起。
余絲韻