喺二十一世紀呢十幾年裏面，全球金融市場不斷起伏，當中有唔少金融權威人士都做咗錯誤決定。MarketWatch網站列咗二十一世紀以嚟五大最令人中伏投資建議，睇下邊個「超錯」。
登登登凳，要講到最錯嘅，真係冇人比得上前美聯儲主席格林斯潘。喺佢「領導」下，美國出現歷史性嘅低利率，對大銀行鬆散嘅監管、以及鼓勵私樓業主以可調整利率貸款等，都堪稱為○○年以來最離譜嘅錯誤。最不可原諒嘅，係佢唔相信美國會出現全國性房屋價格嘅大崩潰，仲聲稱：「就算樓價跌，對宏觀經濟都唔會有持續影響。」結果呢？唔使講大家都知引爆金融危機，大錯特錯呀！
雖然冇規定話美聯儲主席一定要係投資高手，不過佢哋對市場有舉足輕重嘅影響，所以犯大錯實在係難以容忍。前美聯儲主席伯南克就係一個人辦，雖然佢曾經成功阻止美國金融體系徹底崩潰，但佢低估咗次按危機嘅嚴重性，令情況走向下坡。
喺○七年危機爆發前，伯南克自信咁話：「雖然次級信貸市場出現混亂，但就整體經濟及金融市場而言，情況係受控嘅。」一年之後，貝爾斯登同雷曼兄弟相繼倒閉，情況真係夠晒「受控」！
獲得第三名嘅，係前奧本海默（Oppenheimer）分析師惠特妮（Meredith Whitney），一○年佢警告美國50至100個城市同鄉鎮嘅千億美元貸款，將為佢哋帶嚟嚴重嘅債券違約問題。不過，美國最後都度過咗艱難時期。惠特妮預測「失手」後結束咗自己公司，依家喺保險公司做投資經理。
第四名係「末日博士」麥嘉華（Marc Faber） 同彼得希夫（Peter Schiff）預言美元同金價。○九年麥嘉華話，美聯儲嘅零息政策同量寬會觸發「魏瑪式惡性通貨膨脹」，令美元變成一文不值。但佢又認為金價會不斷升，連彼得希夫都話，黃金每安士價格會攀升到55,000美元。依家美元冇報廢，金價又跌，兩位可謂係「燈神」。
「榮登」第五名就係高盛預測油價，高盛喺○五年估原油價格會升至每桶105美元。到○八年春天，原油價格升超過每桶100美元，高盛分析研究員Arjun Murti估原油價格會翻倍至每桶200美元。不過幾個月後原油價格見頂，跌到每桶147美元。環球充斥原油供應及商品超級循環引發熊市。家陣？50美元都冇呀！
余絲韻