港股昨日尾市轉跌為升，主板成交增至六字頭，惟五窮月未到，在反覆市當中搵食亦難度倍增。帥哥今日揀嚟的金風科技（02208），勝在炒作概念多，除兼具深港通概念及業務穩步增長等因素，近日獲券商唱好，不妨在周四季績公布前趁勢炒番轉。
睇番金風過去幾年盈利紀錄，均維持不俗增長，去年純利急增逾五成至28.4億元人民幣。集團將公布今年首季業績，大摩已率先吹起摩笛，預期其首季盈利按年增長近五成，較市場普遍預期約8%之增幅高一大截，亦預測其股價於六十日內跑贏同業，目標價睇14.74元，評級為「增持」。同時，花旗亦將金風評級由「沽售」升至「買入」，目標價大幅上調至15元。
至於近期成市場熱話的深港通，金風亦同時於深港兩地上市，由於基本因素較佳，故備受市場關注。
走勢上，該股自上月初開始沿着10日線緩緩向上，10日及20日線已先後重上50日線，昨日收報12.96元，升4.6%，若於現價有承接，有勢突破250日線阻力13.7元，中線目標睇14.4元。
帥哥