Market Insight：內銀負面因素消除

明日就到「超級星期四」，即期指結算+美國及日本央行公布議息結果，投資者似乎關注日本央行出手多過聯儲局，短期效應係口yen短期呈弱，但開完會隨時係另一個樣子。同樣地，內地股市風頭近日完全被商品期貨掩蓋；滬綜指昨日再升至近全日最高位收市，但上海股市全日成交僅1,343億元人仔，相反一個螺紋鋼期貨成交已多過成個股市。不過，商品期貨行情出現逆轉，鐵礦石跌停。

期貨市場係零和遊戲，散戶好易輸死都未得天光，所以只係短期瘋狂，一批炒鬼湊吓「供給側改革」熱鬧。雖然鋼價近期升咗唔少，但鋼鐵股首季仍集體虧損，轉盈要望下一季。

債轉股影響屬長線

國企亦陸續公布首季業績，據統計淨利潤跌14%；國藥控股（01099）僅多賺14%，同去年增長近三成冇得比，股價亦回吐逾3%。水泥和鋼鐵將繼續積弱，建築業傳統首季係淡季，次季應有好轉。投資環境今年首季與去年同期差別大，券商股及保險股盈利跌幅相信最大。

投資者最關心的仍是內銀股表現，去年全年幾乎已無增長，照趨勢今年將錄得倒退，不良貸款上升亦受關注，睇落仍係冇乜錢途之類。不過，衰如滙控（00005）尚可終極反彈，純粹聽幾大銀行老總口脗未必咁差。例如建行（00939）預料去年純利增長速度已見底，中行（03988）估計今年盈利將會穩定；如果內銀股今年盈利無惡化，相信股價已反映負面消息。

雖然個「債轉股」劣評如潮，但規模有限，就算有影響都屬長線。內地銀行業淨息差一路收窄，不良貸款率一路上升，所以利潤亦一路縮水。一五年，銀行業平均淨息差2.54%，不良貸款率1.67%，簡單計數：「2.54-1.67 = 0.87」，銀行業仍可保持利潤。

買二三線要守戒條

不過，內銀股現價已反映相當惡劣前景，例如淨息差減不良貨款率已接近零。當然，內地金融體系好似危機四伏，企業債水平極高，但中國「五個蓋冚十個樽」已有長久經驗；你有你唱衰，真正會爆煲可能等多三年又三年。近期環球銀行股已大幅反彈，渣打集團（02888）收市後公布首季業績隨即在倫敦大升，若內銀股首季業績不致倒退，隨時有個小驚喜。

大市昨日雖反彈，但下跌股數近千隻，近期熱炒之細價股紛紛隕落。天能動力（00819）被質疑做假帳暴瀉兼停牌，又係「美麗有罪」，一四年蝕3億元人仔，一五年轉賺6億元人仔，復牌解釋通常都係例牌，只爭在你信邊個？天順證券（01141）炒燶股輸15億元，間公司市值都係得24億元，睇見都戥佢肉痛。

另阿里健康（00241）兩年前賣殼，被證監會裁定反收購守則，但仍獲豁免全面要約。買二三線股就預咗隨時唔聲唔聲嚇你一驚，惟天能八個月內由2個幾升到8蚊足足兩倍有多，捉到升浪肯定發達，但唯一戒條是切勿視作長線投資死鍊唔放。

國務院早在去年發布「水十條」，預計到二○二○年將投資4萬億至5萬億元人仔，以達到水治理目標，並確保今年在建重大水利工程投資規模保持8,000億元人仔以上，行業前景有保證。睇番幾隻水務股舊年業績，其實表現唔錯。去年北控水務（00371）收入增加五成，純利增加37%；光大國際（00257）純利升22%；而中滔環保（01363）純利增長更達78%。

水務股宜分注收集

中央去年開始推動PPP模式（公私營合作），若參與PPP項目，企業可向銀行以較低成本借錢，由於此類項目一般涉及較大投資，龍頭股北控水務及光國較能受惠。光國積極發展PPP項目，旗下的光大水務月中公布中標江蘇省鎮江市海綿城市建設PPP項目，項目預計總投資約26億元人仔。

走勢上，近日兩股均現回吐，北控水務昨以大陰燭下跌，收報5元，尚幸20日線最終都失而復得，仍處於由二月中延伸的上升軌，而光國股價短期受制於9元阻力。水務股的收入基礎穩定，且有國策支持，前景仍值得看好，不妨趁回調分注收集，作中線投資。

古勝