絲絲講場：新地郭家又有第三代入局
新鴻基地產（00016）尋日發通告，董事局宣布委任郭基泓為新地執行董事，尋日起生效。郭基泓係邊位，咪係郭氏家族第三代囉！查實佢係新地主席兼董事總經理郭炳聯嘅次子，而郭基泓哥哥郭顥澧，就做緊郭炳聯嘅替代董事。
郭基泓主銷中港物業
絲絲諗，連同新地前聯席主席郭炳江兒子郭基煇依家做緊執董，家陣新地董事局就有三位郭氏第三代加入。
至於郭基泓喺一一年加入新地之前，曾經喺一間國際管理顧問公司工作。而佢喺新地嘅職責包括中港主要住宅及商用物業銷售、項目管理及租務工作等等。而獲委任後，郭基泓每年可獲30萬元作為出任新地董事嘅董事袍金，同埋其他預計酬金約每年230萬元。
余絲韻