Market Insight：新能源車板塊有隱憂

全球股市開始軟軟哋，油價升至40美元受阻，滬綜指到3,000點無力，呢兩個指標若未能闖關，港股升勢亦會行人止步。隔晚美國通脹及消費數據欠佳，令加息預期減弱，但聯儲局究竟想四月抑或六月加息，在耶倫演辭將露端倪，因為若要四月加息，此時便要作「強烈暗示」。

前排有人計數話劉士余上任中證監主席以來，A股有三分之二日數上升，除咗顯示佢腳頭好，並估計中央會再催谷股市，點知A股剛連跌兩日，加上一線城市再限購限貸，同時亦憂慮美國加息將觸發另一輪資金流走，所以暫時好友將需要抖一抖。

大連港貴盡同類股

中國首兩個月工業利潤初見扭轉跌勢，但社科院預計首季GDP僅增長6.7%；話說回頭，早前股市氣氛好「一白遮三醜」，未來公布的首季經濟數據要打醒精神，打頭陣係周五公布之PMI，而通脹是升是跌亦可以有不同解讀，跌則驚通縮，升則驚滯脹。其實內地亂印銀紙程度更勝歐日，加上大城市樓價瘋漲，長遠計滯脹風險尤高於通縮。

未來兩日亦係業績最後高峰期，業績股最誇張係大連港（02880），H股股價狂升兩成，A股（601880.SH）亦漲停板。其去年全年少賺7%至4.8億元人仔，單計第四季亦殊不突出，一五年PE約27.5倍，堪稱板塊當中最貴者，究竟有何魔力吸引投資者？難道因送紅股？

大連港去年底公布配售近15億股新H股，當時尚未有統一配售價，由於國策規定國家資產出售作價不能低於每股帳面淨值，以一五年底PB計每股約3.75元；而集團今年初又向招商局（00144）配售11.8億股新H股，每股作價3.67元。大連港昨最高升至3.67元，可謂對得住班新投資者，但股價急升相信同基本因素無關。

比亞迪競爭勢加劇

汽車股則集體派成績表，雖然大部分均已發盈喜/盈警，但績後表現相當懸殊，比亞迪（01211）、吉利汽車（00175）、華晨（01114）、東風（00489）和廣汽（02238）表現勇銳，長城汽車（02333）和北京汽車（01958）則相當憔悴。比亞迪及長汽是強烈的對比，後者靠SUV曾經威盡一時，但各車廠見SUV好賣紛紛加入競爭，長汽被迫減價迎戰。

比亞迪現時靠新能源車炙手可熱，舊年賣出5.8萬輛，今年目標賣12萬至15萬輛，單睇呢個目標數字，比亞迪股價強得有道理。不過，昨日之SUV、今日之新能源車可能殊途同歸，中國消費市場全部係一窩蜂，過多一年半載即變成供過於求。

當然，比亞迪由核心電池技術、大巴、客車都係領頭羊，一時間無可取代，但新加入者亦眾，而新能源車補貼將每年遞減，比亞迪季績靚仔亦要打個問號，小心做長汽翻版。

金山軟件（03888）是近期業績後心水股之一，該股三年前仍係一隻網遊股，但近年逐步走向國際化及移動終端化，今年目標係「貨幣化」。遊戲業務反而係去年表現最差，現期望王牌遊戲「劍三」在五月終於推出手機版可扭轉跌勢，惟相對其他業務仍較遜色。已分拆在紐約上市的獵豹移動，截至去年底已累積6.3億用戶，國際用戶佔大多數，管理層已將目標由「上客」轉至「賺錢」，希望像facebook一樣靠賣移動廣告取得爆炸性增長。

金軟整固後仍看好

辦公室軟件同樣計劃在移動端「貨幣化」，由免費變成賺錢門徑。「金山雲」的目標是今年底達至營運收支平衡。金軟的估值需用「斬件法」計算，即淨現金（約60億元）+獵豹攤佔市值+辦公室軟件+遊戲+金山雲業務估值，各個業務的估值均不同，又以金山雲的估值最難計，皆因仍未錄得盈利，只能以市銷率暫且計算，但亦尚未有獨立數據分析。

故此，金軟未來的最大變數是金山雲能否取得預定成績；若只看好手機應用程式帶來的廣告收入，單注買獵豹更好。惟管理層對金山雲未來發展顯示信心，在投資期後將進入收成期，相信股價在18元附近整固後，今年股價有機會作較大突破。

古勝