絲絲講場：南旋冧巴暗喻十全十美
話說新股南旋控股（01982）個冧巴幾有意思。主席兼行政總裁王庭聰同現任非執董的細佬王庭交，再加獨立第三方，八二年喺香港創立公司前身恒昌織造廠。
王庭聰話嗰陣係第一次創業，好唔容易。絲絲相信首次創業對佢哋嚟講自然意義深遠，仲代表咗上個世紀香港紡織業嘅興盛時期。王庭聰仲笑笑口咁話，上市冧巴有十全十美嘅意思，因為1+9同2+8都等於10。嗯，呢條橋應該度咗好耐。
第二代低調現身
南旋係家族生意，大佬王庭聰坐正自然唔使講，三個細佬都分晒工。創辦人之一王庭交依家係非執董；王庭真做緊首席生產總監兼執董，主要睇住內地同越南兩邊工廠嘅生產管理；王惠榮就係首席營運總監兼執董，睇晒成個集團嘅營運、研發同銷售策略。
既然係家族生意，咁第二代呢？尋日王庭聰嘅公子王槐裕都有現身，佢同樣喺公司做緊非執董，不過就好低調，話自己只係畀啲投資意見，無實際進入公司營運咁話。
余絲韻