自從大陸出現毒奶粉事件之後，都有唔少內地人專登嚟香港撲奶粉，話晒都關乎小朋友嘅健康嘛。原來唔係一般內地居民先會咁做，連徽商銀行（03698）行長吳學民都嚟香港買埋一份喎。
咁行長就當然唔係專誠嚟香港買奶粉啦，尋日徽商喺香港有業績記者會，佢話趁記者會完咗有啲時間就走去行吓街買埋奶粉。
絲絲八到原來佢第三個B就嚟出世，話說佢今日就飛，係飛之前拿拿聲揸緊時間去藥房掃奶粉，仲問絲絲邊度有藥房添。
話說香港係有限奶令，每個人只可以帶兩罐奶粉離境，行長笑笑口話叫埋其他同事幫手拎添，不過計絲絲話，個BB都未出世就已經撲定奶粉，真係廿四孝爸爸。
其實除奶粉之外，有唔少藥物都好受內地人歡迎。
徽商有個管理層話，之前整親隻手，試過用香港一隻活絡油捽一捽第二日就即刻無事，唔少親戚朋友專登托佢買番幾支看門口，講到香港啲藥油好似神藥咁。絲絲屋企就無喇，唔通都要去買番一支睇吓門口？
余絲韻