絲絲講場：滙豐Double侍產假益港爸
為人父母壓力真係一啲都唔細，尤其係班新手爸爸媽媽更加手忙腳亂！滙豐體諒一班父母員工嘅辛苦，近期改良相關員工福利，算係年初「雙凍」事件後令員工覺得安慰嘅好消息，亦可以藉此提振一吓香港員工嘅士氣添！
據悉由五月一日開始，滙豐爸爸僱員嘅侍產假，會由依家嘅一星期延長一倍去到兩星期，媽媽僱員嘅有薪產假，都會由十二個星期增加至十四個星期。
員工領養照放足14周
滙豐喺侍產假方面絕對係香港區企業嘅典範之一，因為翻查資料，一般爸爸僱員只有三日侍產假，公務員好少少有五日侍產假！望遠少少，新加坡都仲係討論緊提供兩星期嘅侍產假，相信滙豐旗下嘅爸爸員工都會好欣慰。
依家好多人選擇領養小朋友，滙豐都好識做，領養小朋友嘅員工無分性別，享有嘅假期由十二個星期加到十四個星期，等員工可以多啲同小朋友相處。
研65歲唔使硬性退休
醫學發達令人均壽命愈來愈長，好多人都打算延遲退休，滙豐未來會同65歲或以上嘅員工傾談留任安排，而非硬性規定退休。
依家滙豐香港人數包括恒生（00011）在內約3萬人，今次滙豐改良一連串福利政策，應該可以彌補番員工早前備受創傷嘅心，提振士氣。
余絲韻