北水頭等倉：華泰起動跟炒一轉

中金續坐順風車

不過，昨日券商股異動，確係成大半年未見過。事緣中證金公司自今日起恢復轉融資業務五個期限品，並下調專融資費率消息刺激，算係救市之後有關部門首次「鬆手」，令市場揣測中央認為市場槓桿進入合理區間，將逐步放手讓資金流入股市，讓股市更好地服務實體經濟。

本欄上周推介的中金（03908）相當靚仔，可繼續坐順風車。券商股有大食大當選中信證券（06030）及海通證券（06837），昨日升幅均逾半成。

另一方面，筆者亦留意咗隻較生面口的HTSC（華泰證券）（06886），股價成功突破近十個月的阻力位16元，昨日高位見17.7元，收報17.56元，升10.44%。若板塊氣氛短期持續升溫，睇勢呢隻股有機會挑戰去年十一月高位20.9元。

華泰在去年六月上市，可惜上市不久遇上A股崩盤，當時招股價24.8元，股價在去年八月最低見過11.8元，即係較招股價唔見一半有多。

昨日大摩亦發表報告，話未來六十日內華泰股價可以跑贏大市。上市咁耐都未曾大炒過，睇大行口風，不排除大戶們已上足子彈，順勢小注一試亦無妨。

司慕渢