Market Insight：內險股估值可提升

事實上，唔單只新興市場難搞，最近歐洲再推全方位寬鬆政策，美國聯儲局都要放慢加息步伐，美匯指數近日一度落過94.58，資金有機會再次流出美元尋找「食快餐」機會，令人憧憬眼前股市可能醞釀新升浪。

再睇內地，兩會期間領導人同財金高官都異口同聲話要全力穩經濟，包括繼續採取寬鬆的貨幣政策及積極的財政政策，予人印象阿爺會出盡法寶確保經濟軟着陸。另在美元轉弱下，人民幣匯價連同油價一同彈升，難怪股市亦好似春回大地，生機重現咁款。

反彈浪唔使去到盡

魚缸人氣亦係預測後市的重要指標，昨日滬綜指重上3,000點樓上，見一月中以來高位。與早前的反彈浪唔同，呢兩日A股反彈成交明顯回升，尤其係昨日確實見到有資金落場追入券商股。誘因係內地證金公司下調拆借予券商作為兩融業務的轉融資費率，再加上人行行長周小川話希望有更大比例的儲蓄進入股市，即係講到明要撐A股，炒家一於順水推舟，結果唔少A股券商股都漲停板收場。

雖然港股變動唔大，恒指僅升12點收場，報20,684點，但成交都似番啲樣，有801億元。國指試叩9,000關未果，收報8,928點，升45點。雖然從美元轉弱、商品價格及商品貨幣都有一定程度的反彈，但古勝始終認為，任何缺乏實體經濟需求增長這基本面支持的反彈浪，都只能抱着有限注碼玩波幅的心態參與，仲未到跟股票談心定盟的時候。

要知道，經歷過舊年A股崩盤一役，大家都意識到深港通可以隨時再因應市況變化而押後，天曉得次季市況會唔會同舊年一樣，先衝高後回落？沒有基本因素支持的升市，飄忽難測而且為時不長，呢一點大家要謹記。

提及內地券商股，最近先後有投行就此板塊發表研究報告，其中大摩就話，內地股市槓桿回升，將支持券商股短期升勢。要知道，兩融業務乃券商股收益的命脈，亦係主宰內地股本市場興旺的其中一個重要指標。若然監管當局逐步放鬆券商兩融業務，A股氣氛有望持續回暖，但吓吓期望再現舊年四月的大時代就有點不切實際，改變心態，慢火煎魚可能仲襟玩。

港股中互聯互通頭號港資受惠股當然是港交所（00388），昨股價飆高9.8元，收報185.4元，成交達34億元。雖然該股沽空量較上周五翻一番至194萬股，但以沽空比率來看僅10%，乃二月十八日以來最低，又唔使太驚係大戶借勢推高開淡倉升勢曇花一現，照計點都頂到做埋個基金季結，先至再覓方向。

國壽保費收入理想

除咗中資券商股同港交所直接受惠兩地股市氣氛好轉之外，其實內險股亦可一定程度受惠，皆因股市做好的話，理論上內險股的投資收益亦水漲船高，只是相對上影響較為間接，較遲起動亦不足奇，但走勢基本上相同。中國人壽（02628）將於明日公布去年度業績，一月公司曾發盈喜，預計純利按年增幅5至10%，其中一個原因正係投資收益增加。

再看國壽今年首兩個月的保費收入為1,587億元人仔，較去年同期的1,149億元人仔增長38%，保費收入增長勢頭唔錯，若然次季魚缸回暖，目前估值確有上調空間。國壽近日走勢成功突破，昨收報19.28元，10日線一旦升穿50日線，可進一步確認短線利好，且看假前的業績消息，能否為股價闖關送上東風。

古勝