絲絲講場：李小加人工高處未算高

舊年4522萬 加一成

舊年小加總裁嘅合計酬金（包括底薪、表現花紅、股份獎授、福利等）高達4,522萬元，較一四年度嘅4,090萬元，升10.5%。

睇番個Breakdown（分類），原來小加總裁舊年底薪由865萬加到900萬元，表現花紅就由1,009萬加到1,500萬元；不過，股份獎授（即係以股份支付嘅酬金福利）就由2,091萬元微減100萬元，至1,991萬元。

記得市場對小加總裁二○一四年度人工「過四」（四千萬元）之前已經嘩嘩聲，如今一五年度再加一成……大家其實唔使大驚小怪，事關唔好唔記得一四年滬港通成功開通，而一五年四月港股出咗個「大時代」嚟，港交所豬籠入水，小加總裁份糧自然水漲船高！

唔夠洲際芝加哥多

至於港交所主席周松崗，舊年於港交所的董事袍金亦高達313萬元，按年上升32.5%。

小加份糧雖然喺香港屬打工皇帝級，但同其他交易所CEO比都未算最高。好似洲際交易所（ICE）位CEO，一四年人工達1,067萬美元（約8,322萬港元）；芝加哥商品易所（CME）位CEO，出年人工就預期有625萬美元（約4,875萬港元）。但德意志交易所位CEO，出年人工預期就有500萬歐元（約4,371萬港元），少過小加啲啲。

余絲韻