絲絲講場：細時愈曳 大個愈賺得多？

美國心理協會期刊最近發表研究結果，個研究由六十年代開始，一做就橫跨40年，佢哋搵咗超過700個細路，由12歲觀察到52歲，研究幾類性格行為（心散、自卑、冇耐性、悲觀、敢犯規、愛挑戰權威）對細路將來嘅影響。研究發現，喺IQ、出身、教育程度同水平下，愛挑戰權威嘅反叛型細路，日後事業成功過人、賺得多過人！

不過，仔女愈反叛就愈易闖禍。點教好？專家話你知，就先由點對待錢講起。

1)畀佢選擇：富昌金融研究部總監譚朗蔚話，敢犯規嘅細路「思想跳出框框，唔會慣於既定思考模式」，不妨畀細路自己選擇。佢平時帶囝囝去冒險樂園玩，囝囝雖3歲未到，但自己有個銀包仔袋住金幣，「好似真錢咁，由佢自己決定玩咩遊戲」。

有天才都要曉教至得

2)感受金錢：有時出街買嘢，譚朗蔚會畀囝囝直接畀錢人；又會同囝囝「一齊拆利是」，畀佢感受下錢係咩嘢。佢話，唔好驚小朋友撞板就唔畀零用錢，反而要由細培養金錢觀念。幾時開始有零用錢？小學就得。

3)就地取材：囝囝鍾意每事問、鍾意嘟八達通，譚朗蔚就乘機講解「八達通啲錢點嚟，係爸媽放入去嘅」。

4)挑戰唔易：外國專家話，要教仔女知幾時、咩情況挑戰權威先OK，打破規則有風險有後果。

5)唔爭話事：父母可以同佢傾、畀意見，但畀仔女做最終決定。

6)撞板唔幫：仔女撞板係難免，做父母千祈要忍住，唔好咁快幫手搞掂。

7)做好榜樣：以身作則好重要。

8)順其自然：最後提句，父母唔使畀壓力自己刻意培育仔女「反叛」。

余絲韻