北水頭等倉：粵投再跌人棄我取

嚟緊內銀股公布業績，盤數會幾震撼未知，但相信去年第四季績好差就幾可肯定。雖然話兩會期間財金官員已放風話會接受以加大槓桿來救銀行業，但呢一步形同玩火，只有自求多福。

業務盡顯防守特質

昨日跌市，資源股失威乃主因，兩地股市均低收，雖然埋單跌幅收窄，但成交低迷，唔排除係大戶托住指數儲淡倉。總而言之，三月魚缸先高後低機會甚大，如今持貨有利潤，最好盡快套現鎖定利潤，等月尾或四月初低位再作考慮。如手上有錢，一定要揸股票的話，就盡量搵啲現金流及盈利基礎較穩定的股份，希望經得起大風大浪。

講到防守性股份，又睇吓粵海投資（00270）。首先，粵政府乃粵投最終控股股東的背景，唔使怕會關門大吉；其次，公司大部分收入來自供水及電力業務，收益基礎穩定，皆因其中佔大比例的東江水業務水價早已跟香港簽好，外邊颳幾大風收費已訂就不變。去年首九個月，其對香港、深圳、東莞的供水業務產生收入44億元，同比增長6.5%，旺市呢個增幅冇人睇上眼，但經濟持續不景，呢個穩定增幅就好難得。

其他業務方面，粵投在廣州、天津、番禺、香港有物業投資、百貨零售及酒店業務，以及發電業務。去年首九個月純利降15%至31.35億元，主要是期內投資物業公允變動收入大降，以及匯兌差異虧損擴大，若以收入計，同比增幅7%，相對穩定。

粵投昨收報9.6元，逆市升1.1%，往績市盈率約13倍，息率近2.9厘。

走勢上，今年初股價跌穿10至11元的橫行區，波幅區已下移至8.5至10元區域，某程度反映了人民幣貶值的影響。若短期股隨市況波動回落至9元邊，中線可人棄我取。

司慕渢