絲絲講場：虎都家族快人一步

虎都（02399）位90後太子爺郭漢鋒（Ben）25歲時就已經係上市公司CEO；但佢囝囝仲勁，今年得3歲，已經會巡視公司業務！

Ben乜都快人n步，佢舊年以25歲之齡坐上做虎都CEO，估唔到佢早畀人封咗盤，結咗婚生埋囝囝，仲唔止一個，係生咗兩個囝囝！

尋日Ben同絲絲講起，話兩個囝囝雖然一個得3歲，一個得歲半，但已經「好壞」！「好壞」？在場嘅虎都財務總裁鍾明杰（David）即刻解畫，話「好曳」咁解，David仲話「男人唔壞女人唔愛」嘛！

囝囝會唔會好似Ben咁接手家族事業呢？Ben就話，有帶大仔去公司睇吓環境，講笑咁話唔排除之後做童裝業務時，出動囝囝做代言人！3歲就已經開始巡視公司業務，睇嚟好快可以接手做童裝部CEO（如果開嘅話），話唔定行得仲快過爹哋添。

余絲韻