冠君產業信託（02778）行政總裁李澄明今年6月底就退休，佢之後有搞作，就係返母校做義工。
佢母校？就係香港大學，李澄明係讀經濟與會計出身 。其實佢喺港大做義工都做咗好多年，做得最多係幫校內講座請嘉賓。
佢最記得請過阿里巴巴主席馬雲嚟講Talk，嗰時阿里巴巴都仲未紅，「未係好多人識馬雲」；佢亦請過黑石集團創辦人施瓦茨曼（Stephen Schwarzman）嚟添！果然粒粒皆星。
退休後李澄明笑笑口話要慳啲使，啲資金要慢慢搣，因為唔知要搣到幾時。在場嘅冠君同事即刻踢爆，話李澄明以前買落咁多冠君嘅基金單位，每年派息都好和味。
余絲韻