金融世界出名兇狠，尤其係華爾街！能夠生存仲成為精英，當有過人之處。以下係14位華爾街精英人生最重要嗰句，佢哋唔怕公開畀你知，至怕你睇完仲要問點解。袋到幾多落袋，睇閣下造化。
1.「喺華爾街，千祈唔好自斷後路」
瑞信CS NEXT Fund聯合主管Alan Freudenstein
2.「要善待所有人，因為睇住你風光向上爬嗰班，你有乜事跌番落嚟時，會見番佢哋」
券商BTIG首席環球策略師Dan Greenhaus
Greenhaus話齋，金融世界無嘢係必然嘅，更加無鐵飯碗或梗位。
3.「趁消息最壞時入貨」
德銀證券首席國際經濟師Torsten Slok
Slok話，呢句無論係投資股票、主權債、定外匯，都一樣啱用。
4.「你識邊個、識啲咩都唔重要，重要嘅係有邊個識得你」
瑞信另類基金核心策略部主管Kelsey Deshkler
5.「對人講市況講經濟，要清楚淺白到連自己父母都聽得明」
嘉信理財首席投資策略師Liz Ann Sonders
6.「要做每朝最早返工嗰個」
JP摩根股市策略部美國主管Monica DiCenso
就係咁，上司唔少得DiCenso，事關有乜大單嘢發生，佢早已喺公司坐鎮，上司安心晒。
7.「唔可以有自我、唔理啱定錯，只理賺唔賺到錢」
對沖基金Eagle Bay Capital創辦人J.C. Parets
8.「你做呢份工，嫌你好人得滯喎」
巴克萊美國信用交易COO Bob Douglass
Douglass入行第一年喺盤房做就畀上司咁話。事關入得盤房做，常時要做啲好Tough嘅決定，冇得下下做好人，嗰度唔係做好人嘅地方。
9.「唔好以為公司冇咗你唔得」
JP摩根首席投資策略師Kate Morre
10.「當所有專家同預測講埋同一樣嘢，真正即將發生嘅肯定係第二樣」、「報紙A1頭版講嗰樣，要睇跌沽空；C16版講嗰啲，要睇升買入，一路買到等佢上A1頭版」
加拿大資管公司Gluskin Sheff首席經濟師及策略師羅森伯格
11「面對強權亦要講真話」、「尊重他人」、「捍衞對嘅嘢」
布魯金斯學會Hutchins Center財政貨幣政策主管David Wessel
12.「Drive for show, putt for dough」（發球係表演，食胡靠推桿）
中信里昂證券分析師Mike Mayo
呢句係高爾夫球格言，意思係幾靚嘅揮桿發球都係擺姿勢，推桿入到洞先係最緊要。Mayo三十幾年前第一次參加高球賽，就係因為一個好短嘅推桿推失，即輸。佢自此謹記，投資睇住細位至緊要。
13.「要管好自己情緒，先有能力理財」、「假設自己唔夠個市醒，最終就會醒過個市」、「大部分值得做嘅嘢，都應該慢慢咁做」
瑞信資產管理宏觀投資部主管Jonathan Wilmot
14.「唔好一味諗住要做最醒嗰個，事關世界上總有人比自己更聰明；反而應該保持好奇、虛心學習、對市場上咩係有趣持開放態度」
Square 1 Bank副總裁David Schawel
余絲韻