絲絲講場：儲錢為乜？ 港女養父母港男氹仔女
今日係三八 婦女節，講樣嘢應吓節啦，就係原來港女孝順過港男！咁講並非憑感覺，而係絕對有數據支持，係一個投資調查得出嘅結果。
女人保守 鍾意儲蓄
資產管理顧問公司貝萊德做咗個《環球投資者取向調查》，其中香港區數據發現，本港男女投資取向好唔同。44%港女理財目標首要係儲蓄，多過港男（36%）。
咁儲錢嚟為乜先？有四分一（25%）港女現時為供養父母而儲錢，比起港男（21%）多一截！尤其係單身港女，就更加孝順，事關有39%係為咗養父母而儲錢，即是每五個有兩個係乖乖女；會咁做嘅單身港男就只係得30%。都係生女窩心啲！
不過咁，港男其實一樣好負責任。20%港男儲錢主要係為咗留畀下一代，咁諗嘅港女只得13%。仲唔快啲講聲「多謝爹哋」！
調查又發現，港女鍾意儲錢多過投資；而就算有投資，港女投資組嘅現金佔比都係比港男高。
男人自信 落手投資
點解寧願揸Cash多過投資？六成港女認為投資係賭博，多過港男（51%）；仲有就係，覺唔覺得自己識嘅問題，41%港男認為自己具備投資知識，咁諗嘅港女得28%。
港女冇自信？未必。事關有44%港女已聘用專業財務顧問，比港男38%多一截，即係港女信專業，港男信自己咁解啫。
財金絲打巴打睇投資
女性重長線回報
女性投資差過男性？安里證券研究部董事湯麗鴻（Kimmy）話一啲都唔覺，只係投資目標唔同啫。女性着重長線投資，所以會集中睇啲短線回報未必好高、但長遠有可觀收益嘅投資產品；相反，男性愛短炒，所以佢哋投資回報望落好似高啲咁。
兩性贏輸無分別
ADS Securities零售市場銷售總監陳健豪（Aaron）覺得，講到投資，女性同男性嘅贏面應該無咩大分別。佢亦見唔少女性一樣投機。
但女性嘅家庭觀念比男性重啲，會留多啲錢幫補屋企，所以無太多剩餘錢投資；而男性啲錢就多數自己儲起，咁用嚟投資嘅錢會相對多啲。
基金藍籌夠穩陣
獨立股評人黃思敏（Jess）認為只係觀點與角度不同。女性較穩陣，愛長線投資；男性就進取啲，多啲買細價股與衍生工具；咁唔代表女性投資渣過男性！
佢嘅投資組合七成係現金，其餘投資基金或藍籌股。佢亦鍾意儲錢，但儲蓄目標唔係為自己，而係為咗父母，希望為佢哋日後嘅退休開支、醫療支出、住屋需要做好準備。
余絲韻