油價波動，股市就跟住日升日跌，總之舞到你頭暈，短炒捉錯路隨時左一巴右一巴。好似前日港股彈散，但前晚油價反彈，加埋A股昨日先跌後回穩，港股昨日又彈番上19,000點樓上。
為今之計，若閣下覺得心儀股份估值到了理想的中長線買入價，就分注行事，少理指數升跌，盡量避免短炒，以免消耗鬥志。
接近農曆新年的旅遊旺季，濠賭股昨日開始見到有資金流入，博旺季炒一轉。講到新春，有術數專家就話，下周四立春過後股市就會有轉機，呢啲真係信不信由你，反正呢個一月班淡友都經已贏到飽晒，結算完市況回穩休養生息亦符合劇情推演，只係經歷過呢幾日大上大落，筆者認為中長線行事唔睇指數表現，咁頭腦可能會清晰啲。
國務院公布涉核領域白皮書，表明將建設核電強國，惟見核電設備股僅個別發展。其中上海電氣（02727）前日股價創下52周新低3.06元後，昨日反彈3.2%，收報3.2元，成交金額7,223萬元。
上電主力做高效清潔能源、工業裝備、現代服務及新能源四大業務範疇，其中前三者的收入佔比均逾三成。截至去年中期為止，公司在手的核電核島設備訂單約147億元人民幣。國家要支持行業發展，行業龍頭企業自然是扶持對象。早前上電的資產重組已獲上海國資委批覆，而最近亦有消息指，中證監已受理上電發行A股購買資產之申請。
走勢上，上電股價3元水平乃一重要支持位，守得住中線市況配合博上番3.8至4元阻力區唔係咩大難事，不妨留意操作機會。
‧國務院公布涉核領域白皮書，將建設核電強國。
‧去年全國規模以上工業企業利潤下降2.3%。
‧市傳人行要求香港中資行收緊人民幣銀行間拆借。
司慕渢