絲絲講場：15招減壓神技學定過年

1.整定To-Do List

整張To-Do List出嚟，唔好最後一分鐘先諗拜年着咩衫、帶邊位男女友返屋企團年。冇張List，輕則心神恍惚，重則神經衰弱。

2.適時深呼吸

假期塞滿節目忙過返工？小心唔記得抖氣。依家立即來一秒深呼吸，可以撻着身體個放鬆Mode，血壓都降番。

3.計劃勿離地

一個新年，N個女友男友。48小時內想約晒A、B、C、D出嚟？唔畀佢哋發現對方都有難度，莫講話你是否真係有心有力。諗得貼地啲，訂啲能力範圍內嘅Plan，唔好自己逼自己埋牆角。

4.留意頭暈身熱

躁底、易攰、頭痛、胃部不適、覺得好怯、胃口變晒？中咗即是壓力好大，要及早處理，咪等爆煲先嚟收拾。

5.Plan定Budget

過年支出多，有利是攞嗰啲，就話有得幫補吓；派利是嗰啲，冇陰功。Plan定個使錢預算，望住個Plan做人，唔好使凸。

6.忌暴飲暴食

唔好暴飲暴食，均衡飲食可以減壓。愈大壓力愈唔好暴飲，醫學證明酒精會加壓。

7.緬懷「那些年」

節日同家人朋友一齊，會勾起好多「那些年」，花少少時間去回味美好嗰啲，大笑出嚟，係個好好嘅減壓方法。

8.吹水益身心

吹水可減壓有數據支持。美國心理協會做過統計，話自己冇傾訴對象嘅人當中，一年後有43%壓力指數升咗。

9.聽歌降血壓

有壓力？立即開機聽嘢。大自然嘅聲音同古典音樂（貝多芬、莫扎特同威爾第呢類）有助降血壓。唔係乜音樂都得，Hip-Hop同Pop就冇乜作為，甚至仲搞到血壓高咗添。

10.落街跑兩圈

運動令大腦釋放安多酚，令人開心啲、壓力少啲。食團年飯前出街跑兩跑，飯後年宵行兩轉，最啱係一班親朋戚友齊齊出動。

11.夠瞓至緊要

研究顯示（查實唔使研究講，係人都知），唔夠瞓容易出現受壓、焦慮、焦躁，個躁底仲會Keep到第2日。

12.飯後眠一眠

瞓個晏覺，可降體內皮質醇，立即減壓。又多個理由食飽就瞓。

13.睇時機鬆人

就算同屋企人感情幾好，都會有頂唔順之時，爆前要識閃。Tips係，唔好自己一個走咗去，挾個人同你入廚房幫手，或者同小朋友玩，就冇咁礙眼。

14.壓力日日清

壓力要趁早KO，仲要日日清，事關累積落嚟會變抑鬱。

15.搵醫生求救

上述14招出齊都搞唔掂？似乎係時候要搵專業人士或醫生傾傾。

余絲韻