中證監重罰網民15萬
每逢A股大跌市，唔少內地股民都會喺股吧、平台吐吓苦水，不過呻還呻，千祈要小心。尋日內地官媒話，有個內地網民因為發表言論擾亂市場，被中證監殺一儆百，重罰15萬元人民幣。
話說呢位劉網友，喺上年六月一個股吧發表「偉論」，話要「把所有倉位調整到半倉以下，能空倉就空倉，預計周四周五出重大利空」，短時間內已經有4.27萬次閱讀同81條評論。呢幾句何止字字值千金，短短二十九個字罰咗15萬，每粒字平均五千幾蚊o架。
唔怪得絲絲搵內地券商同分析員傾吓A股前景時，無論任何市況下，佢哋永遠都係A股大好友！明晒。
余絲韻