絲絲講場：花旗林智剛留人靠把口
銀行業內有KYC（Know Your Customer，認識你的客戶）方針，即是要知道個客啲料。
不過絲絲聽聞，花旗環球個人銀行業務零售銀行業務主管林智剛（Lawrence）Know Your Customer之餘，仲Know Your Employee，對員工一樣有傾多啲偈收吓料，唔係等到人哋遞信先解決。之不過，就算Lawrence收到辭職信，佢一樣有計留到人。
親身「落地」了解員工
啱啱升職擔大旗嘅Lawrence話，佢自己每次轉職，都會同上司傾偈，望上司指點方向，所以當自己做咗主管後，都鍾意平日「落地」同員工溝通，一有時間就去分行打個白鴿轉，觀察吓前線嘅工作習慣。
講到溝通，Lawrence對挽留人才亦有番兩道。話說公司有位好能幹嘅女員工，生咗第二個BB冇耐就想辭職，皆因佢第一個小朋友啱啱升小學，屋企只有一位工人，佢自己又要返工，所以朝早分身不暇，湊唔到兩個小朋友。
聽完後，Lawrence覺得問題「No Big Deal」，唔需要用辭職解決。佢哋於是酌情延後嗰位員工嘅返放工時間，結果成功留住位人才。
Lawrence話，唔只員工辭職呢啲緊急關頭要出動傾偈，平日都要多啲關心員工，仲話唔同員工有唔同傾偈方式，「有啲鍾意飲住咖啡傾，有啲鍾意摸住酒杯傾，甚至要去海旁散住步傾，總之對員工都要做好KYC！」唔知Lawrence自己又鍾意邊種傾法呢可。
余絲韻