Market Insight：中資股吸引力下降

A股要維穩，一月一日推熔斷機制，先唔講對一個經濟數據又或阿爺一句說話，可以閒閒哋癲炒3至4%的股市有冇作用，惟經歷去年粗暴救市，外資領教過都怕怕。綜觀近日內地經濟數據，好似早兩日製造業PMI差到暈，人民幣愈跌愈急，而且見離岸與在岸差距愈行愈遠，資金外逃情況似在加劇，橫睇豎睇，中資企業除了估值夠平外，實在搵唔到第二個賣點。

對buy side基金經理而言，錢是客戶的，買唔買關鍵係有無故事配套。好可惜，單是「平」從來都無說服力，業績唔得再跌多一、兩年，今日的低PE股，一年後隨時變成高PE股，整體大市幾時見底？真係要睇中國經濟轉角位幾時出現。

蘋果公司變招救亡

北韓餓住肚都要試玩氫彈，令成個亞洲股市死多二錢重。近日中國股市震盪，已禍延全球股市出現難睇的開局，加埋北韓的核試，地緣政治不穩，今年聯儲局係咪咁容易加到四次息，值得商榷。聽晚美國出就業數據，非農職位估緊20萬個，達標估計對股市影響有限，反而可以博吓低於預期，資金回流的可能。

傳蘋果公司向供應商削減首季iPhone產量訂單三成，相關零部件及代工股捱沽，瑞聲（02018）跌5.1%最甘，高偉電子（01415）跌1.8%，富智康（02038）跌1.3%。查實Apple Watch銷情開頭係威係勢，之後無以為繼，iPhone 6s的小修小改版本用戶唔多滿意，蘋果公司股價去年中在132.8美元見頂，輾轉已經碌到落102美元，高位計就快唔見四分之一。

美國科技界一些爆料網站已經講緊，蘋果公司可能唔跟以往六月公布，九月見街的傳統，可能提早出新一代iPhone挽救銷情。話時話，計一六年PE，蘋果公司比瑞聲仲要低，過多一兩個月見蘋果公司隊得再深啲啲，在下都心思思諗緊撈啲。

上次私有化失敗十八個月後，新世界（00017）捲土重來，向新世界中國（00917）提私有化，出價比停牌前溢價25.6%，每股7.8元，涉及約214億元，昨日新中股價升20.6%收報7.49元。

新世界本身股價有近六、七成資產折讓，卻以高於去年六月底新中每股資產淨值6.995元出價，表面睇當然無着數，但睇番個幾月以來，新中向恒大（03333）賣資產套現155億元人仔（部分代價是永續債券），真正所花有限，趁機平平哋收番帳面上極便宜的土儲，試問又點會計錯數呢！

A股前日已見鋼鐵股回勇，昨日走勢更勁，鞍鋼及馬鋼A股分別升7.4%及10%，連帶煤炭股及其他金屬股亦受追捧，本港H股也跟隨升勢。資源股鹹魚翻生主要借力於政府「供給側改革」，總理李克強連日到鋼廠和煤礦視察似為顯決心；不過，同時有報道指9省今年重點項目投資，總規模逾14萬億元人仔，內地政策經常搖擺不定，去產能隨時讓路給穩增長。

炒資源股略為反智

內地鋼鐵價賤過白菜價已非新聞，奇在產能仍年年增加，淘汰落後產能只是空話。鋼廠熔爐一開就不能停，所以產能不能話減就減，地方政府亦不願區內鋼廠停產，影響就業。今次「供給側改革」三令五申，究竟可以去到幾盡要拭目以待。然而，即使供給端有改善，中國經濟下行壓力將進一步影響需求，是否功過相抵還未可知，現時即大炒特炒有反智味道。

中國鋼鐵工業協會公布，十二月中旬重點鋼企粗鋼日均產量連續6個旬度下降；而十二月鋼鐵行業PMI為40.6，按月升3.6，雖脫離七年新低，但距離50榮枯分界線仍遠；新訂單指數大升至40.9，顯示需求端有改善。數據為鋼鐵股升勢護航，但資源類若盼達至供需平衡料需一段時日，市場周街平貨，跟風炒作隨時中招。

古勝