Market Insight：基建鐵路股要暫避

昨日個市都算蠱惑，朝早開21,714點，好快已經見買盤掃上，恒指最高見21,880點，以為早市打好個底會試返高少少，點知十點過後，個市靜過鬼，大戶買意不足，指數亦浸浸落。

兩點過後，連開市價都穿埋，最低落到21,668點，最後跌99點收報21,704點，主板成交連續兩日唔夠七舊，得689億元，點數睇落跌得唔算甘，但過千隻股票見紅，有進帳僅四百多隻，氣氛都幾差。

國際油價跌到每桶37美元邊，「三桶油」打瀉晒，中石油（00857）及中石化（00386）跌1.1%及2.1%，收5.17元及4.46元，後者見埋52周低位，中海油（00883）則跌2.9%報8.17元。一向以來，商品市場癲同衰起上嚟都可以過晒火位，弱美元加埋中國在海嘯前的粗放型經濟增長，推動國際油價突破140美元，時移世易，今日連「零頭」都唔夠。

產油國愈窮愈見鬼

咁油價幾時見底？睇國際環境似乎未有耐，今次油價跌浪成因複雜，包括：強美元、中國經濟失速錯估新增需求、美國頁岩氣冒起成石油淨出口國、俄羅斯出口增加、OPEC成員貌合神離、沙特財困堅抗減產使OPEC日漸失落於油價操控能力等等。

唔好話40美元，即使油價返到60美元，眾多海灣產油國都統統入不敷支，全部陷入財赤，要靠變賣家當及發債度日。有句話叫愈窮愈見鬼，尤其海灣國使慣歎慣，要勒緊褲頭，真係講就容易。睇番沙特仲有相當於總產量一成六的閒置產能，如果肯短痛減產，仲可以托得一時三刻，但市場係反應最快的投票機器，睇上星期OPEC開會後油價愈隊愈有，似乎更多人相信產油二世祖會選擇過得一日得一日，如同歲晚清倉，要錢唔要貨。

創科可望走出困局

中國經濟未有起色，美國卻一枝獨秀叻到有條件加息，經濟進入穩定復甦周期，受惠於呢個環境的本地股票唔多，最具代表性的，一定係七成生意都來自美國，主攻裝修家居必備的電動工具生產的創科實業（00669）。

今年專賣自家翻修家居的連鎖店Home Depot股價累升26%，反觀關連性頗大的創科都升20%，即使直接比較升幅唔多合適，但至少可見創科有條件脫離港股氛圍的泥沼，比較貼近美國關連股份強勢。

上半年，創科營業額及盈利分別升10%及16%，至24.74億美元及1.59億美元，主要是佔總收入七成九的電動工具錄得16.7%的增長，反而地板護理及器具較失色，營業額及溢利分別減少9.7%及17.5%，尚好是不足以影響整體數字。預測全年賺3.5億美元，明年賺4.23億美元，一六年市盈率16.7倍，以未來兩年約20%年增長，現價中線有吸引力。

此外，還有一點未完全發揮的利好因素，是創科以美元收入為主，生產基地成本不少以人民幣計價，人民幣進入貶值期的話，對創科有一定的好處。

在「一帶一路」國策下，基建股曾是市場寵兒，據內地報道，鐵路「十三五」規劃已編制完成。根據規劃，「十三五」期間全國新建鐵路不低於2.3萬公里，總投資不低於2.8萬億元人民幣。雖然國家大力推動基建投資，而在經濟下行壓力仍大的情況下，中央有機會進一步增加基建投資，藉此拉動經濟復甦。

中鐵建難扭轉弱勢

中央雖大力推動基建投資，但對基建鐵路股的刺激有限，多隻基建股十月以來反覆下跌，中交建（01800）昨再跌4%，已跌穿七月八日股災日低位。中鐵（00390）亦跌5.22%，失守6元關口，以5.99元收市。至於中國鐵建 （01186）相對較強，股價僅跌1.73%報10.18元。

中鐵建走勢強於其餘兩股，相信係主要受惠於集團正分拆中國鐵建高新裝備（01786）上市，加上日前宣布中標近93.8億元人仔的巴基斯坦公路項目，故對股價帶來支持。然而，在國家大力推動基建投資下，整體板塊表現仍然如此不濟，相信在氣氛偏淡之下，中鐵建10元大關將不保。

古勝